Páll, Evran og ESB

Eftir mikil ferðalög innanlands sem utan þá er kominn tími til þess að taka til við að tjá sig.

1. Beðið eftir Birni. Vonandi tekur Björn af skarið og veitir Páli Ramses hæli hér. Ég tel að Íslendingar (embættismenn) eigi að sýna mannúð í verki og breyta um verklag í þessum málum. Skoða mál einstaklinga sem hingað leita með því hugarfari að eftilvill er hægt að hýsa viðkomandi - ekki byrja á hinum endanum eins og gert var í máli Páls.

2. Evran og ESB. Ekki skil ég þessa leikfimi hjá þeim sem vilja að við reynum að taka upp Evruna án þess að gerast aðilar að ESB. Þetta er ekki gerlegt og þessi umræða er tilgangslaus. Það eina vitræna er að hefja aðildarviðræður og kanna hvaða möguleikar eru til staðar. Þjóðin getur ekki vegið og metið aðstæður ef það er ekki farið í alvöru umræðu um þetta mál. Með aðildarviðræðum skýrast málin og menn geta hætt að velta fyrir sér ýmsum hjáleiðum, það er tímaeyðsla.

3. ESB og Ísrael. Af einhverjum mér óskiljanlegum ástæðum hefur ESB ákveðið að auka tengsl sín við Ísrael -bæði pólitískt og á svið efnahagsmála. Þetta er gert þrátt fyrir að Ísrael brýtur allar reglur um mannréttindi sem ESB þykist halda í heiðri. Og hefur hent Gefnarsáttmálanum út í hafsauga. Það er rætt um að Tyrkir eigi erfitt með að uppfylla inngönguskilyrði ESB á sviði mannréttinda. En Ísrael er alltaf stikkfrí. Það hafa jafnvel heyrst raddir um að Ísrael gæti fengið aðild að ESB. Þeir eru jú í Evróvisíón!

Athugasemdir

[Gunnlaugur Ingvarsson (IP-tala skráð) 18.7.2008 kl. 10:34]

Já það getur vel verið að bæði Tyrkir og Ísraelar gangi í Evrópusambandið. En við Íslendingar höfum þangað ekkert að gera, hvorki fyrir eða eftir að þessi fjarlægu lönd ganga inn í Bandalagið. Þetta Bandalag er hönd dauðans og passar ekki stoltri smáþjóð eins og okkur. Það hefur enginn þjóð í Evrópu s.l. 60 ár náð eins glæsilegum árangri við að byggja upp samfélag sitt eins og við. Það hefur okkur tekist fyrir vöðva frelsisins. Við skulum ekki glata þeim kröftum sem í frelsinu og stoltinu býr.

Lifi frjálst og fullvalda Ísland.