Bullukollar

Það er skoðun margra að nú verði að flýta uppbyggingu stóriðjunnar. Bæta skal kjör þjóðarinnar með n.k. flýtimeðferð. Pétur Blöndal vill selja náttúruauðlindir hið fyrsta. Óli Björn Kárason blaðamaður hefur gengið svo langt að stinga uppá því að lög um umhverfismat verði numin úrgildi. Fleiri hafa stigið fram, Jón Gunnarsson hefur mælst til þess að Alþingi sé ekki að flækjast fyrir með reglum og lögum sem er ætlað að hindra umhverfisslys. Og nú hafa nokkrir bæjarstjórar ofl. forsprakkar félaga birt heilsíðuauglýsingu í blöðum það sem er skorað á ríkisstjórnina „að snúa vörn í sókn“, „taka af skarið“ – og flýta byggingu álversins á Bakka. Þessi kór er að biðja um að varúð sé látin lönd og leið, lög numin úr gildi, linað á reglum osfrv. En þessum bullukollum er hollt að átta sig á því að alvöru fyrirtæki í áliðnaði geta ekki staðið að uppbyggingu í löndum þar sem regluverkið er ekki í lagi. Orðstír þeirra er brothættur og það eru eingöngu verstu umhverfissóðarnir sem myndu taka það í mál að byggja í landi sem fylgir ekki þeim reglum sem eru í gildi í dag. Er þetta félagsskapur sem þessir aðilar vilja vera í? Og við þetta má bæta ábendingu Dofra Hermannssonar: „Ég skil forsendurnar að baki skoðunum Jóns Gunnarssonar alþingismanns en hins vegar er furðulegt að skynsamt fólk skuli láta sér detta í hug að það sé hægt að henda frá sér lögum um mat á umhverfisáhrifum. Finnst fólki orðspor landsins ekki nógu laskað nú þegar? Er kannski næsta heilræði að verða betri en Nigeríumenn í að svindla á fólki?“

Athugasemdir

[Gunnar Jóhannsson (IP-tala skráð) 16.10.2008 kl. 13:47]

Auðvitað eru þessar hugmyndir nokkuð glannalegar en þó gæti það gerst að við sem þjóð stöndum frammi fyrir því að ÞURFA að breyta reglum og lögum um umhverfisvernd einfaldlega til að halda þessum rekstri þ.e.a.s. þjóðfélaginu gangandi.  Margir hafa lagt áherslu á að virkja hugvitið frekar en náttúruna, en við sjáum nú árangur af þeirr virkjun!!  Viðskiptasnillingar sem eru búnir að sökkva þjóðinni í skuldir.  Það mætti alveg slaka aðeins á öfgafullum kröfum umhverfisverndarsinna sem eru komnir langt út fyrir alla skynsemi. 

[Hjálmtýr V Heiðdal, 16.10.2008 kl. 14:49]

Sæll Gunnar

Þú verður að gera þér grein fyrir því að við getum ekki breytt reglum um umhverfismat. Það mun ekkert fyrirtæki taka í mál að sneiða hjá því. Nema glæpafyrirtæki. EES samningurinn og væntanleg ESB innganga okkar gerir það líka ómögulegt. Svona er nú lífið. Svo höfum við ekkert leyfi til þess að taka lán hjá næstu kynslóðum - hvorki í náttúruauðlindum eða fiskistofnum. Því sem núverandi Íslendinga hafa klúðrað eiga þeir að klára án þess að skuldbinda næstu kynslóðir of mikið. Þegar þú talar um „öfgafullar kröfur umhverfisverndarsinna“ þá ert þú í raun að tala um það sem viðgengst í heiminum í dag. Og það sem er ráðandi er normið en ekki öfgar. Og svo skaltu sleppa því að ræða um skynsemi eins og hún sé þinn fasti fylginautur. Þegar þú talar um hugvit þá þarftu ekki að binda þig við snilligáfu manna sem stjórnast af takmarkalausri gróðasókn. Það er til hugvit sem fæst við önnur svið.

[Gunnar Jóhannsson (IP-tala skráð) 16.10.2008 kl. 16:35]

Svona er nú lífið já.  Ef við göngum inní ESB erum við heldur betur að skuldbinda næstu kynslóðir á hinum ýmsu sviðum þannig að er þá væntanlega út úr myndinni hjá þér eða hvað?  Ég held ég hafi spurt þig áður og beðið þig um að segja mér hvernig komandi kynslóðir þurfa að blæða fyrir t.d. Kárahnúkavirkjun sem barist var gegn með kjafti og klóm.  Eins hvernig þú og ég höfum þurft að blæða fyrir framkvæmdir þeirra sem á undan okkur gengu hér.  Þvert á móti tel ég að við skuldum forfeðrum okkar sem oft hafa þurft að berjast fyrir lífi sínu hér þá virðingu að nýta auðlindir landsins.

Ráðandi viðhorf sem þú kallar normið þarf ekkert að vera það rétta eða skynsamlega enda breytast viðhorf í tímans rás og oftar en ekki þykja viðhorf fyrri tíma alveg fáránleg og vitlaus.  Í umhverfismálum erum við einmitt í þannig stöu núna, þar sem varla má reka niður tjaldhæl án þess að fá til þess opinbert leyfi eftir undangengið umhverfismat.

Ég hef reynt að átta mig á því hvar í EES samningnum eru ákvæði sem koma í veg fyrir að við breytum lögum um umhverfisvernd og/eða reglugerðum tengdum þeim en bara finn það ekki.  Þú kannski bendir mér á það svona til fróðleiks.  En bara svona til að hafa það alveg á hreinu þá er ég ekki fylgjandi því að varpa slíkum lögum fyrir borð, heldur er ég að spá því að viðhorfið (normið þitt) mun breytast í þessum efnum sem öðrum og komast í betra jafnvægi.  Svo skaltu sleppa öllum skætingi, hann klæðir þig ekki.

[Skætingur Jónsson (IP-tala skráð) 16.10.2008 kl. 21:08]

Þegar tveir öfugmælamenn fallast í faðma er ekki von á góðu. Hjálmtýr heldur að ESB sé málið og Gunnar trúir því að álver skapi gjaldeyri. ESB á eftir að enda á ruslahaugum sögunnar eins og öll önnur bandalög bara spurning um þann skaða sem það á eftir að valda fólki. Varðandi barnatrú Gunnars um álverin góðu þá er nokkuð ljóst að engin gjaldeyrir kemur inn í landið. Heldur er um að ræða millifærslur á erlendum dollarareikningum sem koma íslenska bankakerfinu nákvæmlega ekkert við. Íslensku orkufyrirtækin fá greitt í dollurum sem fara beint í að greiða skuldir án viðkomu á Íslandi. Sú bábilja að Ísland græði svo mikinn gjaldeyri á þessum viðskiptum er virkilega þreytandi. Skrítið hvernig vel meinandi og stundum jafnvel gáfað fólk tekur undir þetta.

Þegar síðan álverin kaupa þjónustu af innlendum fyrirtækjum er heldur ekki verið að skapa gjaldeyri fyrir þjóðarbúið. Lási kokkur kaupir nagla frá Lettlandi í Byko fyrir naglasúpuna sína. Hann selur álverinu þessa fínu naglasúpu sem borgar honum tilbaka í íslenskum krónum. Naglarnir, kryddið, eldúsáhöldin og kokkafötin hans Lása kostuðu gjaldeyri. Hann er því í raun bara að skaffa nettó innstreymi gjaldeyris fyrir vinnuframlag sitt. Eini gjaldeyrinn sem kemur nettó inn í þjóðarbúið er laun og skattar. Hvað skyldi nú eitt stykki álver borga í skatta og gjöld?

[Bjarni G. P. Hjarðar, 16.10.2008 kl. 22:54]

Heyrðu mig nú.  Þú varst nú ekki ósáttur við "útrásarvíkingana" - er ekki allt í lagi að nýta náttúruauðlindir aðrar en meint hugvit viðskiptafræðinga?  Svo er nú einfalt að selja greiðslustrauma á alþjóðamörkuðum, allt frá höfundarrétti á tónlist yfir í rafmagnsframleiðslu.

[Gunnar Jóhannsson (IP-tala skráð) 16.10.2008 kl. 22:58]

Ef orkufyrirtækin eru að borga skuldir erlendis frá þá hlýtur sá gjaldeyrir að hafa komið inní hagkerfið ekki satt?  Það sem þú kallar bábilju er það sem aðrir sjá sem staðreyndir, enda hafa gjaldeyristekjur af álverum aldrei verið meiri.  Þó svo að launin þín fari að stórum hluta í að borga skuldir þá eru það engu að síður tekjur fyrir heimilið jafnvel þótt peningurinn sjálfur komi ekki undir koddann þinn.  Þetta skilja allir - líka þú.  BOK-101

[Sigurður Ásbjörnsson, 16.10.2008 kl. 23:51]

Kæri Hjálmtýr!

Þegar mikið liggur við þá verðum við að fara skemmstu leið að hlutunum.  Þess vegna mæli ég eindregið með því að við fellum niður allar hraðatakmarkanir á vegum og losum fyrirtæki undan þeirri ánauð að færa bókhald.  Við verðum augljóslega að láta hlutina ganga greiðlega.

[Hjálmtýr V Heiðdal, 17.10.2008 kl. 08:22]

Nú er ég orðinn dálítið ruglaður; hver er að ávarpa hvern? Nem hjá Sigurði og Gunnari að hluta.

Gunnar, þetta með skætingin var ekki illa meint, en það er rétt hjá þér að sleppa ber skætingi. Ég var í rauninni að bregðast við lýsingu þinni á að umhverfissinar „séu„komnir út fyrir alla skynsemi“. Skynsemi ætti að vera kjölfesta hvers og eins - en misjafnlega metin frá öðrum sjónarhóli en getur verið skynsamleg samt. En náungi sem kýs að kalla sig Skæting er með ágæta pælingu um Lása kokk. Eru tekjur þjóðarbúsins ekki fyrst og fremst í formi skatta á rekstur og laun? Þannig hlýtur eitthvað að skila sér frá álverunum. En hvernig kemur dæmið út á endanum þegar debit og kredit hafa verið gerð upp. Náttúruauðævin verða að vera í skilagreininni. Og þá erum við, Gunnar, komin að kynslóðunum. Það er erfiðara að eiga við gengnar kynslóðir og okkar aðgerðir geta ekki hreyft mikið við þeim. Kanski bara þeirra orðstír. En ókomnar kynslóðir eru fæddar til þess að bíta í þau epli sem við ræktum. Hvort þeu eru súr eða ekki ræðst að hluta af okkar gerðum. Þetta er auðvitað bara almenn skynsemi sem við erum auðvitað sammála um. Um ESB og álver má ræað fram og aftur og þannig á það að vera. Ég vil sjá hvaða framtíð menn sjá utan ESB, ætla menn að einangra landið eða leita á önnur mið. Mér sýnist ljóst að beint framhald -að vísu án risavaxins bankakerfis í einkaeigu að sinni - getur ekki gengið.

Það verður að finna festar sem halda.

[Villi Asgeirsson, 17.10.2008 kl. 09:20]

Sammála Sigurði. Sleppum bókhaldi og skýrslugerð til að flýta fyrir batanum. Mér finnst líka koma til greina að losa um pening í löggæslunni. Þeir sem fremja ljóta glæpi væru sendir til Rockall og skildir eftir. Það kostar minna en fæði og húsnæði á Litla Hrauni. Þetta með hraðaksturinn er líka gott.

Virkjum allt, haus og foss!

Kíkið svo endilega á www.nyjaisland.is