Alltaf gaman hjá Hannesi

Það er fróðlegt og  skemmtilegt að lesa greinar eftir prófessor Hannes Hólmstein Gissurarson.  Fréttablaðið birtir í dag (20. febrúar) enn eina grein hans um uppáhaldsefni  hans: forseta vorn, fjölmiðlafrumvarpið og Baugsmiðla. Hér er skýring Hannesar  á óförum Íslendinga sem leiddi til hins hrikalega efnahagshruns: „Átökin umfjölmiðlalögin 2004 mörkuðu tímamót. Eftir þetta töldu auðjöfrar sér alla vegi færa. Þeir eignuðust flesta fjölmiðla. Forsetinn gerðist klappstýra þeirra og  veislustjóri. Allir vita, hvernig þeirri ferð lauk.“

Sökudólgarnir eru hér  skilmerkilega skráðir og skilgreindir.

En svo verður manni á  að flétta upp í gömlu viðtali við Hannes (sept. 2007)  og þá er öðrum eignaður „heiðurinn“ af  ferðinni sem „allir vita hvernig lauk“. 

Þar stendur orðrétt haft  eftir prófessor Hannesi : „Og ég kemst að þeirri niðurstöðu að íslenska  efnahagsundrið eigi sér alveg eðlilegar skýringar. Og þessar skýringar eru  fólgnar í því að það sem við gerðum að við virkjuðum fjármagn sem áður lá  dautt.Við gerðum það á tveimur sviðum. Í fyrsta lagi voru fiskistofnarnir  verðlausir áður fyrr. Þeir voru óframseljanlegir, óveðhæfir, óseljanlegir.  Síðan er kvótum úthlutað og þá verður til fjármagn þarna. Hitt atriðið var að  ríkisfyrirtækin, þau láu einmitt dauð. Þetta var fjármagn sem var óframseljanlegt,  óveðhæft, óskráð. Enginn átti, enginn bar ábyrgð á. Fyrirtækin voru seld og þá  verður skyndilega til fjármagn. Þannig að af þessum tveimur ástæðum, bæði  kvótakerfið og einkavæðingin, þá varð til fjármagn sem ekki var til  áður.“...„Þannig að á Íslandi hefur verið síðustu 16 árin að myndast gífurlegt  fjármagn, og svo fóru bara víkingarnir með þetta fjármagn út.“

Og áfram: . Hugsið  ykkur, bankakerfið hefur á milli sjö og tífaldast á svona, þessum fjórum fimm  árum. Og hugsið ykkur hvað það væri nú gaman ef við bara héldum áfram og gæfum  í.“

Nú verð ég aðeins að klóra mér í höfðinu og kanna hvort það sé einn og sami maðurinn sem skrifar undir þessu  nafni. Það er nefnilega þekkt fyrirbrigði að menn hafa stolist í texta  annarra og skráð undir sínu nafni. Og hlotið dóma fyrir.

En hér er ekkert slíkt á ferð, þetta er allt eftir Hannes Hólmstein.

Maðurinn  sem eignar sér  („það sem við gerðum“) heiðurinn af íslenska efnahagsundrinu hefur nú afsalað  sér heiðrinum og tilnefnir forsetann sem sökudólg „Ólafur Ragnar var nátengdur Baugsfeðgum“ og er að sögn prófessorsins  upphafsmaður  „ferðarinnar“  með því að neita að undirrita fjölmiðlalögin.

Og nú er það ekki neinn heiður að hafa átt upptökin, nú er það glæpur.

Hvað eiga  menn að gera þegar aðal hugmyndafræðingur Skussaflokksins býður upp á svona  skrif?  Sjálfur segir hann í  upphafi greinar sinnar í dag:

„Íslands óhamingju verður allt að vopni“. Ég tek  undir þessi orð hans.

Athugasemdir

[Halldór Halldórsson, 20.2.2009 kl. 13:08]

Og svo þarf kvikmyndagerðarmaðurinn að spyrja út í við hvað er átt, þegar ýjað er að því að hann og aðrir útrásarvinir hlaupi til verndar í hvert sinn sem Ólafur Grímsson er gagnrýndur!

[Hjálmtýr V Heiðdal, 20.2.2009 kl. 13:22]

Ég verð að spyrja aftur.

Það sem ég skrifa er ekki vörn fyrir Ólaf Ragnar (hvern ég hef aldrei kosið-hvorki í pólitísk störf eða forsetastörf). Ég er að skoða HHG og hans loftfimleika í grein minni. Þá skondnu þversögn sem hann býður okkur uppá.

Þú verður, Halldór minn, að vera skýrari í kollinum til þess að ég skilji þig og þín vandamál.

[JC (IP-tala skráð) 20.2.2009 kl. 15:47]

Tvískinnungurinn er algjör!

Þetta á við fleiri en HHG. Þegar að vel gekk þá voru margir sem vildu eigna sér heiðurinn en nú vill engin þeirra taka ábyrgð.

Man ummælin ekki alveg orðrétt en voru skemmtileg frá Geir Haarde ekki fyrir svo löngu síðan: "Ef ég hef gert eitthvað rangt þá þykir mér það leitt".  

Ég held að við fáum ekkert betri afsökunarbeiðni en þetta.

[Svavar Bjarnason (IP-tala skráð) 20.2.2009 kl. 17:57]

Hannes er sennilega skemmtilegasti rugludallur bloggheima. En hann hefur þó vit á að hafa ekki opið fyrir komment á bloggi sínu. Enda veit hann að þar yrði hann ævinlega skotinn í kaf.

[Ólafur Ingólfsson, 20.2.2009 kl. 22:49]

Hugmyndafræðingar nýfrjálshyggjunnar engjast nú eins og ormar á öngli. Heimsmynd þeirra, þar sem græðgi og auðsöfnun er ofar öllu, hefur siglt öllu í strand. Það verður fróðlegt að fylgjast með hugmyndafræðilegum fimleikum þeirra næstu mánuðina. Gott hjá þér, Hjálmtýr, að halda skrifum Hannesar Hólmsteins til haga.

[Helgi Jóhann Hauksson, 21.2.2009 kl. 03:07]

Mjög góð samantekt. Reyndar var mér oft orðið á orði löngu fyrir hrun að gaman væri að taka saman rit um rök og málflutning HHG sem gæti heitið „Hannes gegn Hannesi“ því í rökum hans og málatilbúnað hefur alla tíð verið að finna algerlega andstæð rök eftir því hvað þarf að fóðra hverju sinni. - Þetta er skýrt dæmi um það.

[Jack Daniel's, 21.2.2009 kl. 07:03]

Eftir að ég hætti að taka ruglið í HHG alvarlega og líta frekar á þetta sem rugl í honum sem einn stóran brandara hef ég æ oftar hlegið að ruglinu í honum.
Maðurinn er dæmdur ritþjófur og rugudallur svo ekki sé meira sagt.
Væri gaman að fara í gegnum skrif hans síðan hann fór að blogga og sjá hvernig hann gjörsamlega hringsnýst í skoðunum sínum eftir því hvernig vindurinn blæs.

Vorkenni satt best að segja ættingjum hans fyrir að þurfa að gangast við þessu skoffíni.

[Haukur Nikulásson, 21.2.2009 kl. 07:26]

Nákvæmlega rétt lýsing á þversögnunum í HHG Týri, ljósara verður það ekki. Þessi taglhnýtingur og yfiraðdáandi Davíðs er ótrúlegt fyrirbrigði svo ekki verður kveðið sterkar að án þess að verða dónalegur.

Í kjölfar hrunsins og farsans við að koma Davíð út úr yfirstjórn Íslands hafa Sjálfstæðismenn fórnað öllu. Það er nánast eins og allur þeirra málflutningur nú snúist um að vernda kallinn í Svörtuloftum og skiptir engu hverju er til fórnað. Það þarf að fara langt aftur í söguna til að finna annað eins átrúnaðargoð, þetta er eins og hjá illa biluðum sérstrúarsöfnuði.

[Hjálmtýr V Heiðdal, 21.2.2009 kl. 10:55]

Hannes er mælskur, svo mælskur að hann trúir sjálfur því sem hann fullyrðir hverju sinni. Hann situr enn í Bankaráði Seðlabankans - fer út með skolvatninu þegar DO tappinn er tekinn úr.

En hann er örugglega ekki af baki dottinn og mun dandalast áfram um ritvöllinn á sinni truntu.

Kanski er það best.

[Baldur Gautur Baldursson, 22.2.2009 kl. 21:27]

Það gerir mig alltaf svo hryggan að heyra þegar fullorðnir menn haga sér barnalega.  Hannes Hólmsteinn ætti eiginlega að flytja til útlanda þar sem fólk er ekki búið að fá sig fullsatt af dellunni hans og draumasögum í ætt við ævintýri Lock!

Hannes Hólmsteinn er orðinn all sorglegur þegar hann í birtuleika sínum ræðst á herra Ólaf Ragnar forseta. Það var jú forsetinn sem beðinn var að ganga erinda ríkisvaldsins við útrásarpiltana.  Ekki öfugt!