Skilanefnd Sjálfstæðisflokksins

Enn er verið að ræða fjármál stjórnmálaflokkanna.

Allt frá 1993 hafa ýmsir þingmenn reynt að koma skikki á þess mál. Jóhanna Sigurðardóttir hefur verið staðfastur flytjandi tillagna um opnun bókhalds og takmörkun á fjáraustri fyrirtækja í flokkssjóði. Það er óhætt að segja að hennar tími sé einnig kominn í þessu máli. Eftir því sem ég kynni mér betur feril hennar vex álit mitt á Jóhönnu.

Helsta hindrunin hefur ætíð verið afstaða Sjálfstæðisflokksins og við atkvæðagreiðslu árið 2006 voru Sigurður Kári Kristjánsson og Birgir Ármannsson á móti nýjum lögum sem lagfærðu ástandið á þessi sviði.

Eftir stendur að háar fjárhæðir voru greiddar í sjóð valdamesta flokks landsins þremur dögum áður en það varð ólöglegt. Þessi aðgerð  afhjúpar siðferðisbrest flokksmannanna sem fóru á stúfana til að afla fjárins og þeirra sem samþykktu að taka við þeim.

Aðrir sem vissu um þennan gjörning eru einnig sekir um siðleysi. Þessir atburðir hafa vakið öldur reiði jafnt innan Sjálfstæðisflokksins sem utan.

Eftir því sem best verður séð þá eru þessar upphæðir einsdæmi og spurningar um tilgang styrkjanna hljóta að vakna.

Og það má spyra: Hvers vegna fengu Vinstri grænir ekki 55 millur?

Vegna þess að þeir báðu ekki um það?

Vegna þess að þeir voru ekki við kjötkatlana?

Svarið er já við báðum spurningum.

Þessi vinnubröð Sjálfstæðismannanna segja sína sögu um tengsl milli manna sem eru í viðskiptum og vilja ná árangri og manna sem eru í stjórnmálum og skortir siðferði.

Og nú verður „skilanefnd“ Sjálfstæðisflokksins að safna fé til að endurgreiða 55 milljónir í þrotabú FL-Group og Landsbankans.

En endurgreiðslan hreinsar ekki andrúmsloftið.

Það eru bara kjósendur sem geta haft síðasta orðið í þessu máli.

Athugasemdir

[Gunnar Jóhannsson (IP-tala skráð) 14.4.2009 kl. 18:52]

Þessi pistill þinn er hverju orði sannari.  En þú bara kláraðir ekki að skrifa hann.  Þannig sleppir þú alveg að fjalla um stærstu styrkveitendur Samfylkingarinnar sem er Baugur og tengd fyrirtæki.  Mér þykir sú staðreynd færa heim sanninn um það að Samfylkingin gekk erinda þeirra m.a. í harðri andstöðu sinni við fjölmiðlalögin.  Ég hef sagt það áður og segi það aftur, þetta er allt sami skíturinn.  Ég held, svei mér þá, að Framsóknarflokkurinn sé sá flokkur sem tekið hefur best til í sínum herbúðum.  Er að hugsa um að kjósa þá.  Hugsaðu málið.  Maður heldur alltaf með sama fótboltaliðinu en það sama gildir ekki í pólitík, nema fyrir þá sem eru blindir í trúnni.

kv

Gunnar

[Hjálmtýr V Heiðdal, 14.4.2009 kl. 19:15]

Sæll Gunni vinur

Ég var einmitt að hugsa um að skrifa meira og þá með þig í huga. Það eru nú hæg heimatökin hjá þér að kjósa Framsókn - það er að mínu mati rangt mat hjá þér að þeir hafi skúrað í hornin.

Samfylkingin er samsett úr mörgum hópum og einstaklingum og eins og hjá Sjálstæðisflokknum þá eru þar ýmsir mislitir sauðir.

Ég er ekki tilbúinn að ganga þá leið sem þú stikar - að allsstaðar sé sami skíturinn.

Mitt val byggir mikið á þeirri skoðun minni að við eigum að sækja inn í ESB og losa okkur við krónuna-verðtrygginguna-okurvextina- og hið háá matvælaverð. Ég tel að okkur muni, líkt og Dönum og Englendingum, haldast á auðlindum okkar svo fremi sem landssölumenn Sjálfstæðisflokksins sé haldið í skefjum. Sjávarútvegsstefnan ESB getur ekki verið verri en einkavæðing þorskanna sem er staðreynd með útfærslu kvótakerfisins.

[Hjálmtýr V Heiðdal, 14.4.2009 kl. 20:33]

Sæll aftur

Kíktu á það sem ég skrifaði um fjölmiðlalögin í greinaflokknum Baugur, Borgarnesræðan og smjörklípuaðferðin.

[Sigurður Þorsteinsson, 14.4.2009 kl. 21:07]

Á þetta að vera nýtt innlegg inn í umræðuna. Þetta er svona svipað að lesa og horfa á enn einn þáttinn af leiðarljós, innihaldslaust bull!

[Hjálmtýr V Heiðdal, 15.4.2009 kl. 00:08]

Sæll Sigurður

Getur þú verið ögn nákvæmari? Ég er ekki að reyna að koma með eitthvað nýtt, bara að setja hugsanir mínar á bloggsíðuna og jafnvel fá skoðanir annarra á þessum vangaveltum. Þú bætir engu við og dæmir allt innihaldslaust bull.

Ég er engu nær um hvað þú vilt leggja til málanna.

[Gunnar Jóhannsson (IP-tala skráð) 15.4.2009 kl. 01:00]

Sæll aftur,

Oftar hef ég nú kosið annað en Framsókn, t.d. R-listann, Alþýðuflokkinn, og Sjálfstæðisflokkinn.  Hefði meira að segja að öllum líkindum kosið Samfylkinguna næst ef flokkurinn hefði haft vit á því að hafna ekki sínum hæfasta og reyndasta manni Jóni Baldvini.

Ég er ekki á móti ESB en ég treysti ekki forystu Samfylkingarinnar til að leiða aðildarviðræður.  Og annað varðandi ESB er að ég tel að það sé tómt mál að tala um að fara í einhverjar viðræður á næstu misserum, ekki nema skríðandi með betlstaf.  Ég vil geta gengið þarna inn uppréttur og með stöðu til að semja en við höfum ekki slíka stöðu núna.  En eitt skaltu vita Hjálmtýr að eini kosturinn við inngöngu í ESB er gjaldmiðillinn enda eru aðrir kostir sem taldir hafa verið upp bara rakalaust bull.  Ef við náum þeirri stöðu að uppfylla skilyrðin fyrir inngöngu munum við búa við stöðugleika og lága verðbólgu sem þýðir að verðtrygging lána hefði ekkert að segja lengur.  Svo er það mikill misskilningur að það sé eitthvað séríslenskt að hafa verðtryggingu.  Þetta fyrirkomulag þekkist víðast hvar innan ESB og heitir vaxtaálag eða verðbótaþáttur vaxta.

Og að lokum er það ekkert mat mitt að Framsókn hafi tekið best til hjá sér heldur er þetta það sem blasir við þegar skoðaðir eru framboðslitar flokkanna.

[Gunnar Jóhannsson (IP-tala skráð) 15.4.2009 kl. 09:16]

Gleymdi þessu

http://www.youtube.com/watch?v=qv7WNdKkAU8&feature=channel_page

Góðar stundir.

[Sigurður Þorsteinsson, 15.4.2009 kl. 10:49]

Sæll Hjálmtýr

Á efnahagshruninu, styrkjamálunum og ástandinu yfirleitt eru yfirleitt margir fletir. Þeir sem hafa kennt 12 ára börnum t.d. ritgerðarsmíð, geta fengið úr 25 barna bekk, yfir 20 ritgerðir sem eru nánast nákvæmlega eins. Þegar þú lest blogg eftir fullorðna sem eru nánast endurtekning á því sem einhver hundruð hafa áður skrifað, þá er slíkt innlegg afar lítils virði. Það var ekkert nýtt í þessu bloggi þínu.

[Hjálmtýr V Heiðdal, 15.4.2009 kl. 11:04]

Sæll Sigurður

Í grandaleysi mínu vissi ég ekki að ég væri þátttakandi í ritgerðar„prófi“.

Það er rétt að ég er ekki endilega með nýjar upplýsingar eða ný sjónarhorn. En ég hlýt að hafa leyfi til að tjá mig með mínum hætti.

Vissulega geta einstaklingar eins og þú látið þetta „ónýnæmi“ fara í sínar fínustu - en við því er ekkert að gera af minni hálfu.

Nema að hætta og varla viltu það.

En þakka þér samt fyrir ádrepuna - ég skal leggja mig allan fram við það að finna nýja fleti á málum. En ég mun samt ekki láta

vitneskjuna um þig „þarna úti“ hindra mig í mínum skrifum.