Krísuvíkurleið í kosningaslag

Glænýr formaður Sjálfstæðisflokksins veit að aðildarumsókn í Evrópusambandið er einn besti leikurinn í núverandi stöðu  Íslands. Hann hefur lýst því yfir í ræðum og riti. En hann getur ekki starfað  samkvæmt sannfæringu sinni eftir að flokkurinn hans samþykkti  „að aðild að Evrópusambandinu þjóni ekki hagsmunum íslensku þjóðarinnar“.

Fylgishrun flokksins er staðfest í  skoðanakönnun eftir skoðanakönnun, evrópusinnarnir eru að yfirgefa skipið sem  situr á skerinu. Nýi formaðurinn veit að íslenska þjóðin á engra annarra  kosta völ en að taka skrefið til fulls frá EES til ESB. Hann má bara ekki  segja það. Þess vegna bregður hann á það ráð að birta heilsíðu auglýsingu um  „trúverðuga leið að upptöku Evru“. En í rauninni er hann að hrópa: ekki  fara..við lofum að gera eitthvað, finna einhverja leið! (nema þá réttu og raunhæfu).

Textinn í auglýsingu Bjarna Ben sýnir að  sannfæringin um þessa leið er ekki sterk. Traust sitt setur  formaðurinn á Alþjóðagjaldeyrissjóðinn og “sátt og samvinnu við  Evrópusambandið“.  Það liggur þó fyrir að talsmenn ESB segja þetta ófæra leið   og henni verði illa tekið - alls ekki í „sátt og samvinnu“!

Ljótt er ástandið í flokknum sem eitt sinn  var stolt félagsmannanna, flokkur sem skaffaði vel í bitlingum og aðstöðu. Málsmetandi sjálfstæðismenn eins og Benedikt Jóhannesson benda á að flokkurinn  hefur engin svör sem gagnast. Ýmsir sjálfstæðismenn skrifa á bloggsíður sínar  að þeir geti ekki samvisku sinnar vegna kosið flokkinn. Margir ætla að skila  auðu. (Flokksmaskínan er reyndar búin að finna upp slagorð til að reyna að sporna við því háttlagi: Auður er rauður!) Brátt standa ekki eftir nema þeir kjósendur sem munu kjósa flokkinn jafnvel þótt hann væri ekki í framboði.

Auglýsing Bjarna er í samræmi við sérálit  Illuga Gunnarssonar í skýrslu Evrópunefndar fyrrverandi ríkisstjórnar: „leita  eigi eftir samstarfi við Alþjóðagjaldeyrissjóðinn um að stefnt verði að því að  íslensk stjórnvöld og IMF vinni að því í sameiningu að í lok áætlunarinnar geti  Íslendingar tekið upp evru sem gjaldmiðil“  

Viðbrögð frá flokksmönnum hafa komið fram: „Hið  ótrúlega hefur skeð. Aðeins 3 vikum eftir lok landsfundar Sjálfstæðisflokksins,  er einn frambjóðenda flokksins farinn að boða Evrópu-stefnu sem er þvert á  samþykktir flokksins.“ (Loftur A Þorsteinson) „En nú sýnist BB jr. líklega lag  til að nálgast aftur sitt heittelskaða bandalag og það með tveimur fremur en  einni leið: fyrst með því að viðra þessa evruleið (sem Reykjavíkurbréf í dag  segir byggja á falskri forsendu), sem er e.k. leið til þess að láta loks segja  sér enn einu sinni: "Nei, þú færð bara evru, ef þú gerir svo vel að gangaí EBé!" (Jón Valur Jensson)

 En Bjarni Benediktsson er ekki fyrsti formaðurinn sem sendir skrítin skilaboð til kjósenda nokkrum dögum fyrir kosningar. Geir H Haarde birtist kampakátur á heilsíðu auglýsingu skömmu fyrir síðust kosningar. Það stóð skýrum stöfum: „Þegar öllu er á botninn hvolft er traust efnahagsstjórn stærsta velferðarmálið“

Nú er öllu á botnin hvolft og nýr formaður boðar ekki „trausta efnahagsstjórn“. Hann boðar einskonar Krísuvíkurleið sem auðvitað leysir enga krísu.

Athugasemdir

[Þorsteinn Helgason (IP-tala skráð) 20.4.2009 kl. 16:19]

Þessi auglýsing er virkilega djúp og þarf ekki litla kremlólógíu til að skilja hana til fulls. Verst að engin auglýsingastofa hefur merkt sér hana. "Í sátt og samvinnu við Evrópusambandið"getur þýtt í stuttu máli: "með því að ganga í Evrópusambandið." Það er sennilega stefna Bjarna en hann má ekki segja það beinum orðum. Ef hins vegar er verið að boða Krísuvíkurleiðina þá er ljóst að hún er lokuð og þetta gerir þá ekki annað en að tefja málið. Þeir sem segja sífellt að aðildin sé ekki á dagskrá nærri strax og langt sé í evru vinna manna mest í því að lengja þennan tíma með vífilengjum og sjónhverfingum.

[Hólmfríður Bjarnadóttir, 20.4.2009 kl. 17:25]

BB var hlyntur aðild nokkrum dögum fyrir landsfund en var svo snúið eins og vindhana á einni helgi. Trúverðugt nei ekki verulega, enda er trúverðugleiki ekki inn þar á bæ. Ætli hann læðist ekki út í skjóli myrkurs með haustinu eða jafnvel fyrr, og sláist í hópinn með okkur hinum sem viljum búa hér áfram og gangi í ESB. Manngarmurinn er í mikilli klípu og veit það vel

[Sigurður Þorsteinsson, 20.4.2009 kl. 17:53]

Það er ekki merkilegur málflutningur sem þarfnast þess að bera ósannindi upp á menn. Bjarni Benediktsson hefur ítrekað sagt að hann styðji aðildarumsókn að ESB, ef þjóðin vilji fara í slíkar viðræður. Hann hefur einnig tekið skýrt fram að hann hafi ekki trú á að út úr þeim viðræðum komi ásættanleg niðurstaða. Nokkurn veginn þessi sama afstaða kemur fram hjá Framsóknarflokknum og VG. Það að Samfylkingin er einangruð varðandi aðild að ESB virðist fara afskaplega í taugarnar á mörgum flokksmönnum, við þennan veruleika verða menn samt sem áður að sætta sig við.

[Hjálmtýr V Heiðdal, 20.4.2009 kl. 18:53]

Starfsmenn ESB skilja ekki hvað Sjálfstæðisflokksmenn er að pæla. Í fyrsta lagi geta ríki ekki tekið upp evru einshliða og í öðru lagi hefur AGS ekkert með evruna að gera. Nonsense sagði fulltrúi ESB í útvarpinu.

Bjarni hefði betur kynnt sér málið áður en að hann lét hanna og birta auglýsingu, aðgerð sem kostar hundruð þúsunda króna (ekki evrur).

Hin „trúverðuga leið“ er bara bull og þvættingur.

Hvað næst?

Sigurður - ég ber fulla virðingu fyrir hollustu þinni.

Bjarni Benediktsson og Illugi Gunnarsson skrifuðu að þeir vildu fara í aðildarviðræður (FB 13. des. 2008).

Ekki að kanna fyrst hvort þjóðin vilji fara í viðræður. Viðræður fyrst og svo þjóðaratkvæði.

Ef þú ert að svo að vitna í orð hans „að hann styðji aðildarumsókn að ESB, ef þjóðin vilji fara í slíkar viðræður“ þá ertu að sýna fram

á enn meiri vingulshátt en ég opinberaði.

Hvers vegna vill flokksformaður Sjálfstæðisflokksins fara í aðildarviðræður ef hann hefur ekki hinn minnsta áhuga eða væntingar

á öllu málinu? Þetta kostar töluverða fjármuni og fyrirhöfn (það var m.a. notað sem rök gegn stjórnlagaþingi að það kostaði peninga).

[Baldur Hermannsson, 20.4.2009 kl. 19:00]

Hjálmtýr, ég sá ummæli ESB-kratans áðan á Stöð 2. Hann vísar til yfirlýstrar stefnu sambandsins. Við verðum að hefja samningaviðræður með stuðningi AGS og sjá hvort við fáum einhverju áorkað.

ESB sinnar hafa um árabil rausað um allar þær herlegu undanþágur sem okkur yrðu boðnar ef við færum í aðildarviðræður.

Við erum trúlega sammála um að við fáum aldrei neitt nema við leitum fyrst formlega eftir því. Mér finnst hugmynd Sjálfstæðisflokksins ágæt. Hafni ESB okkur munum við neyðast til að taka upp dollar. Krónan er líklega á banabeði.

[Sigurður Þorsteinsson, 20.4.2009 kl. 19:49]

Hjálmtýr allir flokkarnir fyrir utan Samfylkinguna hafa efasemdir um samninga við Evrópusambandið. Samfylkingin hefur hins vegar ekki skilgreint nein samningsmarkmið enn svo vitað sé. Viðhorf þitt kemur mjög skýrt fram, en það kom líka fram hjá Árna Páli Árnasyni á fundi í Garðabænum. ,, Þið eruð fífl".

Bjarni hefur lýst sinni skoðun að það sé óásættanlegt að ekki sé látið reyna á aðildarumsókn ef meirihluti þjóðarinnar er þeirrar skoðunar. Málið eigi að afgreiða. Mér finnst það ágætlega lýðræðisleg afstaða. Þú getur kallað það vingulshátt ef það hentar þér.