„Hugsið ykkur hvað það væri nú gaman ef við bara héldum áfram og gæfum í!“

Hér er útskrift á stórmerkilegu viðtali við Hannes Hólmstein þann 13. sept. 2007 í Ísland í dag. Réttu ári fyrir stóra hrunið.

Viðtalið hefur vakið athygli fyrir það hversu vel það kortleggur störf manna eins og Hannesar Hólmsteins. Hann situr enn í bankaráði Seðlabankans og getur enn tekið þátt í mótun framtíðarinnar sem bíður eftir okkur!

Athygli vekur að hér fer ekki á milli mála að HHG segir að „við“ séum mennirnir á bakvið „íslenska efnahagsundrið“. Og hverjir erum við? Jú, það eru HHG og hans sálufélagar, Eimreiðarhópurinn sem lagði grunninn með Davíð Oddsson í fremsta sæti. Aðrir sem sitja í eimreiðinni eru m.a. Hannes, Kjartan Gunnarsson, Geir Haarde og Jón Steinar.

 

Spyrill: Það eru margir sem hafa velt því fyrir sér þessu endalausa peningaflæði sem virðist vera bæði inn og út úr landinu – hvort þetta séu raunverulegir peningar eða bara loft?

HHG: Ég er einmitt að reyna að svara þeirri spurningu í erindi sem ég held um íslenska efnahagsundrið í HÍ á morgun. Og ég kemst að þeirri niðurstöðu að íslenska efnahagsundrið eigi sér alveg eðlilegar skýringar. Og þessar skýringar eru fólgnar í því að það sem við gerðum að við virkjuðum fjármagn sem áður lá dautt.Við gerðum það á tveimur sviðum. Í fyrsta lagi voru fiskistofnarnir verðlausir áður fyrr. þeir voru óframseljanlegir, óveðhæfir, óseljanlegir. Síðan er kvótum úthlutað og þá verður til fjármagn þarna. Hitt atriðið var að ríkisfyrirtækin, þau láu einmitt dauð. Þetta var fjármagn sem var óframseljanlegt, óveðhæft, óskráð. Enginn átti, enginn bar ábyrgð á. Fyrirtækin voru seld og þá verður skyndilega til fjármagn. Þannig að af þessum tveimur ástæðum, bæði kvótakerfið og einkavæðingin, þá varð til fjármagn sem ekki var til áður. Og svo var það þriðja…

Spyrill: einhverstaðar að hljóta samt sem áður hljóta peningar að hafa komið…

HHG: Nei, nei, vegna þess að ef þú ert með land þar sem fjármagnið er ekki í höndunum á neinum, sem enginn getur notað það, þar sem það liggur bara dautt þá vex það ekki. En hér á Íslandi var það fært í hendurnar á eigendum, gert skrásett og veðhæft og þá fór það að vaxa, þá lifnaði það allt við. Og síðan það þriðja sem olli því að við höfðum svo mikið af fjármagni, svo mikið af fé og gátum farið til útlanda. Ekki með sverðið eins og í gamla daga, víkingarnir, heldur með verðið. Þriðja ástæðan er auðvitað þessir öflugu lífeyrirssjóðir. Við erum með einhverja öflugustu lífeyrissjóði í heimi. Þannig að á Íslandi hefur verið síðustu 16 árin að myndast gífurlegt fjármagn, og svo fóru bara víkingarnir með þetta fjármagn út.

Spyrill: Ég virðist vera með orkuútrásina á heilanum..það er það sem sumir vilja meina það sem koma skal. Geti jafnvel orðið ennþá arðvænlegra en bankaútrásin.

HHG: Já það væri auðvitað alveg frábært að það yrði. Og þegar að ég svona fór að taka dálítinn þátt í þessu uppúr 1991 þá óraði mig ekki fyrir því að þessi átök sem voru þá við að leggja niður sjóði sem voru bara að styrkja taprekstur fyrirtækja og við að ná verðbólgunni niður, ná hallanum í tekjuafgang og greiða niður skuldir ríkisins. Og sinna öðrum slíkum verkefnum, þá óraði mig ekki fyrir því að síðan með því að einkavæða bankana að þá myndum við skyndilega fá nýja kynslóð ungra sprækra manna sem hafa gerbreytt Íslandi. Og bankakerfið, og ég rek það í fyrirlestrinum á morgun..

Spyrill: Já eins og Björgólfur Guðmundsson..

HHG: já og þeir allir, já hann (BG, innsk.) er bara ungur í anda alveg frábærlega. Hugsið ykkur, bankakerfið hefur á milli sjö og tífaldast á svona, þessum fjórum fimm árum. Og hugsið ykkur hvað það væri nú gaman ef við bara héldum áfram og gæfum í. Þannig að fyrst kemur kvótakerfið svo kemur lagfæringin á ríkisbúskapnum, svo kemur einkavæðing bankanna og útrásin. Og ef við gætum svo farið að selja þekkingu til útlanda, það væri alveg frábært.

Spyrill: Nú kemur aftur upp umræðan frá Samfylkingunni í ríkisstjórn að auðlindirnar þær verða að vera í almenningseigu. Hvað segir þú um það?

HHG: Ég held að það sé voðalega mikilvægt fyrir okkur að gera ekkert svona að trúaratriði. Við viljum öll að hér sé mannúðlegt þjóðfélag þar sem hugsað er um lítilmagnann og þar sem lýðræði er tryggt og almenn mannréttindi eru virt. Það er ekkert ósamkomulag um það. Og eitt af því sem ég komst að þegar ég skoðaði þetta íslenska efnahagsundur var að lítilmagninn – hann hefur það gott á Íslandi. Ellilífeyrinn er að meðaltali hæstur á Norðurlöndum hér, barnabætur til láglaunafólks eru tiltölulega góðar osfrv. Og ég vil bara koma til móts við áhyggjur fólks eins og jafnaðarmanna í því efni. En ég held að samt að auðlindirnar séu bestar ef einstaklingar fái að nýta þær en ekki ríkið.

Athugasemdir

[Þórir Kjartansson, 4.12.2008 kl. 17:46]

Já, það eru til ofsatrúarmenn víðar en í múslimaríkjunum.

[Konráð Ragnarsson, 4.12.2008 kl. 18:07]

Hvílíkur Talibani!

Svona menn eiga bara tala og skrifa á mánudögum,annað hvert ár!

[Sigurður Hrellir, 4.12.2008 kl. 20:37]

Þetta viðtal ætti að vera skyldulesefni í framhaldsskólum ásamt ræðu Ólafs Ragnars: "How to succeed in modern business: Lessons from the Icelandic voyage".

[Hjálmtýr V Heiðdal, 4.12.2008 kl. 21:24]

Davíð Oddsson þreytist seint á því að kenna örlögum fjölmiðlafrumvarpsins um það hvernig fór. Hann segir aftrur og aftur að það hafi ekki verið hægt að veita aðhald vegna þess að miðlarnir voru á valdi auðmannanna. Og enginn vildi segja satt. Viðtalið við Hannes sem hér er birt er tekið í einum „Baugsmiðlanna“ og orð Hannesar eru ekkert nema halelúja um „víkingana“ - ungir sprækir menn sem „fóru bara víkingarnir með þetta fjármagn út“! Semsagt Hannes hrósar sér af því að hafa komið þessu af stað ásamt Davíð og birtist í hvaða fjölmiðli sem er til þess að vitna. Á þessu sést hversu stórkostlegt bull þetta er í Davíð - algjör þvæla!

[Villi Asgeirsson, 4.12.2008 kl. 21:42]

Ég verð að hæla spyrlinum. Hann spurði spurninga sem fæstum hefði dottið í miðri sælunni. Það er ljóst að HHG er búinn að vera sem "intellectual".

[Kjartan Pétur Sigurðsson, 5.12.2008 kl. 10:53]

ótrúleg lesning

[Ólafur Als, 5.12.2008 kl. 12:27]

Ég held að Davíð hafi haft kórrétt fyrir sér - og ekki bara hann - að fjölmiðlar í eigu auðmanna hafi gert þá auðsveipa sér og ekki sinnt sem skyldi þeim viðvörunarbjöllum sem glumdu um árabil. Breytir þar engu þó svo að menn á borð við Hannes hafi farið í trúðslíki, svo berlega sem það birtist okkur nú. Þrátt fyrir grátbroslegt viðtalið við Hannes Hólmstein, þá eru sumir punktarnir sem hann imprar á alveg réttir, sbr. "dauðu peningana". Það sem er m.a. vont við orð/skilning Hannesar er að hann sem stjórnarmeðlimur Seðlabankans virðist ekki gera sér grein fyrir að vöxtur bankanna, eftir að fyrsta fasa einkavæðingarinnar var lokið og bankarnir þegar orðnir mun stærri en áður (m.a. vegna þess að dautt fé var virkjað), var að lang mestu leyti vegna lántöku erlendis frá og m.a. gert í skjóli EES reglna frá Brussel.

Ef fólk hér á þessari síðu - og víðar - ætlar sér að fría sig allri ábyrgð og kasta drullu í Hannes þá er því fólki það vitanlega heimilt. Það hefur lengi verið viðtekinn siður hjá tilteknum hópi manna að ata Hannes auri og nú hefur heldur bæst í þann hóp. Í mínum huga tók stór hluti þjóðarinnar þátt í hildarleiknum og ég veit ekki betur en að oft hafi verið rætt um "drengina okkar" þegar talið barst (ósjaldan) að útrásarvíkingum - ég bjó í Danmörku á árunum 2006 og 2007 og flutti heim nú nýverið og við lestur blaða að heiman, bloggsins og annað man ég ekki eftir öðru en að viðvaranir hafi verið hunsaðar á víðum vettvangi. Aðrir þögðu - sem er ekki skárra í mínum huga - en einstaka maður þóttist sjá e.k. hrun fyrir en ekki einn einasti maður í líkingu við það sem svo varð.

Því tek ég undir orð Önnu en beini þeim væntanlega víðar en hún og segi: Fólk er fífl.

[sigurður örn brynjolfsson (IP-tala skráð) 5.12.2008 kl. 18:57]

allveg makalaust!! Hljomar einsog Guð sagði "Verði peningur!" allt til ur engu. Jæja ekki ber eg abyrgð a þessu rugli,  buin að bua erlendis siðan 1993

hef hinsvegar fylgst með þessu ur fjarlægð og fannst græðgin og best, stærst, rikast  talið orðið all svakalegt s.l. 6-7 ar...svo fallið kom mer ekki a ovart,

en ekki bjost eg við svona slæmu.

[Hjálmtýr V Heiðdal, 5.12.2008 kl. 22:43]

Sæll Siggi

Það var lengi talað um mjúka lendingu eftir þensluna vegna álvers- og virkjanaframkvæmda. En hrein brotlending var aldrei til umræðu. Hannes Hólmsteinn talar stoltur um íslenska efnahagsundrið. Nú er ljóst að þetta var efnahagsviðundur.

Hvernig er veðrið í Eistlandi?

[Björn Heiðdal, 6.12.2008 kl. 09:37]

Hannes vinur minn er einn af þessum mönnum sem segir hlutina eins og þeir eru en lýgur síðan öllu öðru!  Hér segir hann eins og er að peningarnir verða til úr engu.  Seðlabankar heimsins prenta bara peninga og ekkert er á bak við þá nema trú manna á verðgildi þeirra.  Það er þetta sem Hannes er að meina. 

Það má líka lesa út úr þessu viðtali við Hannes að hann geri sér grein fyrir því að erfitt verði að selja fallvötnin og jarðhitan án verulegra átaka.  En Hannes kann ráð við því.  Leyfa íslenskum bönkum að taka endalaus lán í útlöndum með ríkisábyrgð.  Ábyrgð sem fáir vissu um nema ESB sérfræðingar og Seðlabankaráð.  Síðan er bara að bíða eftir næstu kreppu og horfa á bankana fara í skipulögð þrot.  Í framhaldinu láta ríkið taka yfir hræin með öllum þeim skuldbindingum sem því fyglja.  Láta ríkið taka veruleg erlend lán sem ekki er hægt að borga til baka með góðu.  Síðan þegar kröfuhafar heimta greiðslur er ekkert annað að gera en selja/leigja orkuauðlindir landsins fyrir mjög lítið.

Hannes, Davíð, Jón Steinar, Kjartan, Jón Ásgeir, Björgúlfur, Ingibjörg Sólrún, Össur og Geir gleymni eru landráðafólk sem ætti frekar að taka af lífi en taka alvarlega og hlusta á.

[Hjálmtýr V Heiðdal, 6.12.2008 kl. 15:52]

Sæll Björn frændi

Ég vildi að ég væri svona viss í minni sök - nei ég meina um sakir annarra meinti ég. Aftökulistinn þinn er nokkuð langur og bendir til þess að þú trúir ekki lengur á lýðræðið. Það verður að flokkast undir heppni okkar að þú skulir vera meira til orða en æðis á hinu pólitíska sviði.

[Björn Heiðdal, 6.12.2008 kl. 16:51]

Mér finnst ljótt að skilja fólk útundan en auðvitað er listinn aðeins lengri.  Ekki skil ég hvernig þú færð það út að ég trúi ekki lengur á lýðræðið.  Ég er bara ósáttur við fólkið sem er að stýra þjóðarskútunni.  Það er bara alveg hræðilegt hvernig Geir, Davíð, Ingibjörg og Halldór hafa leikið þjóðina.  Endalausar skuldir og síðan stuðningur við innrásina í Írak.  Innrás sem Ingibjörg Sólrún hefur ekki viljað kalla ólöglega eða draga stuðning Íslands til baka.  Hún hefur bara ýjað að því að um tæknileg mistök væri að ræða og hún þyrfti ekki að draga stuðning Íslands formlega til baka vegna þess að þetta væri hvort sem er búið og gert!

Þvílíkur hroki og kaldlyndi.  Hún og Davíð Oddsson væru miklu betra par en Geir gleymni.   

[sigurður örn brynjolfsson (IP-tala skráð) 7.12.2008 kl. 18:16]

sæll felagi, var i Tallinn um helgina að skoða jolaskreytingar i höfuðborginni. Her er besta haustveður, snjolaust, logn og hiti um frostmark, snjoaði mikið fyrir 2 vikum en hvarf fljotlega.

Her er smakreppa einsog annarstaðar en ekkert svipað og a Íslandi. Her er allmennt ekki mikið talað eða skrifað um astandið a Islandi enda ekkert snert kerfið her.

Eg var i viðtali i stærsta dagblaðinu her s.l. helgi m.a. um Islandskreppuna.

Hinsvegar tala utlendingar sem hingað koma frekar illa um Island, um daginn var folk fra UK og Hollandi í buðinni okkar i Tallinn og Island barst a tal einsog oft, venjuleg er folk jakvætt gagnvart landinu en i þetta skipti fekk island og islendingar það oþvegið!

[Skeggi Skaftason, 7.12.2008 kl. 22:59]

Skrýtið að sumir kalli það að kasta að drullu, að endurbirta orðrétt ársgömul viðtöl við menn.