Krísan hjá Krossinum

Gunnar í Krossinum sér verk djöfulsins í efnahagslægðinni. Sjálfur Antikristur kominn á kreik: „Heiminum mun þá birtast maður sem hefur öll ráð í hendi sér. Hann mun leysa allar efnahagskrísur en um leið sölsa undir sig heiminn. Sá maður er antíkristur.“ Þetta skrifar Gunnar á krossinum (Fréttabl. 04.10), og er ekkert að skafa utan af því. Gunnar sá það allt fyrir sem nú bagar oss, skrifaði bók 1991 og ekkert kemur honum á óvart. Svo veit hann að arabar eru að leggja undir sig Evrópu og meira að segja komnir til Íslands (?). „Menn hafa áttað sig á því að Mammon hefur brugðist“ skrifar Gunnar og gefur skít í kenningar Hannesar Hólmsteins - sem heldur því fram að Mammon sé náttúrulögmál. (sjá blogg mitt „Aðgát skal höfð í nærveru þjóðar“) Af tvennu mjög illu þá tel ég að Hannes sé skemmtilegri en Gunnar.

Aðgát skal höfð í nærveru þjóðar

Þegar þjóðin lendir á kapitaliskum bömmer þá verður að útskýra málin svo hún átti sig á ástandinu og leiðist ekki út í örvæntingu. En opnuviðtal Morgunblaðsins við Hannes Hólmstein er ekki það sem þjóðin þurfti. Erum við ekki búin að fá nóg af þessu ævintýri hans um að græðgin sé góð?

Lýðheilsustöð og landlæknir hafa beðið fjölmiðla um að fara varlega. Þessi hrekkur Moggans gæti komið illa við viðkvæmar taugar hlutafjáreigenda sem keyptu nokkur bréf í góðri trú á hið kapitaliska náttúrulögmál (ef trúa má HHG). Hannes segir: „Sumir gera mistök og þeir hætta rekstri. Aðrir gera ekki mistök og þeir halda áfram rekstri. Þetta er lögmál kapitalismans og þegar á bjátar kemur þetta lögmál býsna vel í ljós“. „Lögmálið“ lemur skyndilega í haus þeirra  sem keyptu hlut fyrir 2- 3 milljónir í Glitni. Voru það mistökin sem Hannes talar um? Er þetta ekki grundvöllur fagurgalans hjá Hannesi ofl. sem hafa lagt áherslu á að almenningur taki þátt í dansinum með hlutabréfin? „Í kapítalisma fara menn á hausinn, en láta ekki hausinn, eins og í miðstýrðu hagkerfi“ skrifar Hannes. Fólkinu sem nú hefur tapað milljónum líður örugglega betur þegar kostirnir eru svo skýrt upp dregnir af þeim sem vita best.

Hvar er hún Lána Lína núna?

Glitnismálið er stórmál, en þó aðeins ein birtingarmynd ástandsins. Þú og ég, skuldararnir með mislanga hala, eru fórnarlömb hins brokkgenga kapitalisma. Góðærið, þegar almenningur átti að kaupa hlutabréf, er horfið. Krónan í kasti, sennilega dauðvona. Mörg fyrirtæki dauðvona í óvinveittu umhverfi okurvaxta, gengisrúllettu og verðbólgu. Geir H sagði í fréttum daginn fyrir Glitnisbombuna að ekkert sérstakt væri í gangi. Hann var nýkominn heim og var að kynna sér málin. Næstu nótt er hann við jarðaför nýfrjálshyggjunnar. Við hlið hans stendur Davíð, sem margir telja að sé primus mótor aðgerða sem miði að því koma höggi á Baugsmenn. Fáránleg hugdetta? Veit ekki, en betra hefði verið að hann væri ekki á þessum vettvangi með öll þessi völd. Eftir allt sem á undan er gengið. Það myndi að minnsta kosti draga úr tortryggninni og slá á uppnámið. Og hver verður eftirleikurinn? Voru fleiri kostir í boði - aðrir en að láta almenning punga út hluta erlenda lánsins sem verður dýrt. Frásögn Þorsteins Más Baldurssonar í Kastljósi er merkileg saga. Hann segir beinum orðum að Davíð hafi komið þessu í kring með brögðum. Og auðvitað í þeim helsta tilgangi að komna þungu höggi á Baugsmenn þegar Lána Lína yfirgaf þá um stund. Hvað eiga Jón og Gunna að halda?

Kapitalisminn er vandmeðfarinn

Oscar Wilde á að hafa sagt um tískuna að hún væri svo erfið og vandmeðfarin að það þyrfti að gjörbreyta henni fjórum sinnum á ári. Það verður að segjast að svipað er ástatt með kapitalismann. Þessi yfirgripsmikla björgun almannavaldsins á starfsvettvangi veðmangara er ekki sú fyrsta og áreiðanlega ekki sú síðasta. 

Hvað segir Hannes Hólmsteinn um þennan bandaríska sósíalisma? 

 

Bush: Ábyrg og nauðsynleg inngrip

Arnþrúður er borubrött

Arnþrúður Karlsdóttir á útvarpi Sögu er borubrött þessa dagana. Enda ástæða til þar sem útvarp Saga hefur mælst með mjög góða hlustun í nýjustu könnun á áhorfi, hlustun og lestri fjölmiðla. Í Reykjavík mælist stöðin með um 38% hlustun ef ég man rétt  og það verður að teljast mjög gott.

Sjálfur hlusta ég oft á Sigurð G. Tómasson og einstaka sinnum á aðra dagskrárliði. Í gær heyrði ég Arnþrúði og aðra konu (náði ekki nafninu) ræða um heima og geima. Eitt atriði í máli Arnþrúðar finnst mér fáránlegt; hún réðist að samtökunum Amnesty International og talaði í niðrandi tón um starfsemi AI. Hún sagði að samtök sem þessi væru alltaf á höttunum eftir athygli og gaf í skin að þau fiskuðu í gruggugu vatni. Þekking Arnþrúðar á AI virðist ekki rista djúpt og ætti hún að kynna sér starfsemi samtakanna og hlutskipti þeirra mörgu manna sem þau hafa stutt um allan heim. Annað sem einkennir þennan þátt Arnþrúðar og vinkonu hennar eru hálfkveðnar aðdróttanir um menn og málefni. Fremur óábyrgt og ósmekklegt.

Fólk á flótta

Þegar hrakið flóttafólk ber að ströndum okkar lands er ástæða til að velta því fyrir sér hvers vegna þetta fólk hefur hrakist úr sínum heimahögum. Palestínufólkið sem komið er til Akraness er ekki að flýja í fyrsta sinn. Þetta eru afkomendur fólksins sem stofnun Ísraels hrakti í útlegð til Íraks og svo hefur það sjálft orðið að flýja sökum stríðsátakanna í því landi. En það er enn verið að fjölga palestínskum flóttamönnum. Myndin sem hér birtist er tekin á heimili fjölskyldu sem býr í Jerúsalem.  Ummerkin, sem minna á afleiðingar jarðskjálftanna í Hveragerði, eru afleiðingar heimsókna ísraelskra hermanna. Þeir vaða inn á heimilin, umturna öllu og gera jafnvel göt á veggi til þess að brjótast inn í næstu íbúð. Þetta er gert í þeim tilgangi að gera íbúunum lífið óbærilegt í þeirri von að þeir flýi og gyðingar geti yfirtekið heimili þeirra. Næsta stig aðgerða er niðurrif, þá mæta jarðýtur hersins á staðinn og jafna húsin við jörðu. Alls er talið að það sé búið að eyðileggja 18,000 hús með þessum hætti.  Og Ísraelar eru enn að, hið yfirlýsta markmið Síonista er að ná yfirráðum yfir öllu landi Palestínumanna. Þrátt fyrir alla fundina í s.k. friðarferli er enn verið að fjölga landtökubyggðum og jafna heimil Palestínumanna við jörðu. Um leið og við bjóðum flóttamennina hjartanlega velkomna til Íslands þá er vert að hafa það í huga að hörmungum Palestínsku þjóðarinnar er ekki lokið.

Minning um merkan mann

Minningarþáttur Sjónvarpsins um Sigurbjörn Einarsson biskup var ekki nægilega vel gerður. Það hæfir betur minningu þessa merka manns að vinna verkið mun betur. Með meiri vinnu og yfirvegun þá er hægt að gera góðan heimildaþátt um Sigurbjörn og hans sterku trú. Ræða við menn sem geta fært okkur betri skilning á löngu lífshlaupi biskupsins og viðfangsefnum hans. Það hefði t.d. verið við hæfi að fá umræðu sem Sigurbjörn hefði getað tekið þátt í með innklippum. Sjónvarpið verður að gera betur, maðurinn sem fylgdi þjóð sinni svo lengi og setti sitt mark á líf hennar á betra skilið. Þjóðin á betra skilið.

Palin er galin

Repúblikanar í Bandaríkjunum hafa valið sér varaforseta sem  er fylgismaður kenninga s.k. Creationista. Sarah Palin heitir hún og sést hér í hópi stuðningsmanna.

Hvaða hugmyndir eru það sem hún aðhyllist?  Í stuttu máli tekur hún sköpunarsögu  Biblíunnar fram yfir allar vísindaskýringar síðustu hundrað ára eða svo.  Biblían er gömul bók, verk manna sem höfðu enga vísindaþekkingu sem byggði á  rannsóknum. Þeir höfðu ekki hugmynd um tilveru risaeðlanna, enga innsýn í  innsta eðli hlutanna. Þeir vissu ekki neitt um eldfjöll, orsakir jarðskjálfta  ofl. ofl. sem í dag flokkast undir almenna þekkingu. Raunvísindi voru í  rauninni ekki til í þeirri mynd sem við þekkjum þau.

Fylgjendur „creationisma“ telja að heimurinn væri afrek einnar  veru, þeir nefna sköpunina „intelligent design“ og hafna þróunarkenningu  vísindanna. Í sjálfu sér finnst mér allt í lagi að menn hafi mismunandi  hugmyndir um allt milli himins og jarðar – og tilurð jarðar þar með.

Það sem mér þykir hættulegt í þessu samhengi er sá möguleiki  að fólk með svona  gamlar hugmyndir  komist til áhrifa. Hvað þá á heimsvísu. Nægir að benda á hina s.k. neo-con menn  sem umkringja Bush núverandi forseta BNA. Mikið hefur heimurinn mátt blæða  fyrir  hugmyndir þeirra, og að ekki sé talað um fólkið í Írak og víðar sem hefur  blætt bókstaflega.

Vonandi verður Sarah Palin aldrei vararforseti eða forseti  BNA.

Geir hinn góði

Ég var að hlusta á Geir H Haarde tjá sig um Breiðavíkurmálið í Kastljósi. Mér líkaði ekki tónninn í honum. Hann talaði eins og að Breiðavíkursamtökin hefðu móðgað hann með því að segja frá hvernig málið væri í pottinn búið. Geir sagði m.a. að af tillitsemi við Breiðavíkursamtökin þá hafi þeim verið leyft að sjá frumvarpsdrögin sem eru í vinnslu - en þeir síðan brotið trúnað og kjaftað frá. Ég skil ekki að það flokkist undir tillitssemi að skýra viðkomandi frá þeim hugmyndum sem ráðuneytismenn eru að móta. Frá mínum bæjardyrum séð er það sjálfsagður hlutur. Og sérstaklega þegar það kemur í ljós hversu líf og líðan manna er metin lítils af „sérfræðingum“. Geir sagði einnig að það hafi aldrei verið gert ráð fyrir að þessar bætur gætu bjargað fjárhag manna. Hér gefur hann það í skyn að slíkt búi að baki afstöðu Breiðavíkursamtakanna - annars hefði hann ekki látið þetta út úr sér. Forsætisráðherra kom einnig með netta hótun: „ég veit ekki hvert þetta mál stefnir núna með svona yfirlýsingum í fjölmiðlum“. Hann vill ekki að menn geti tjáð sig þegar þeir fá í hendur frumvarp sem inniheldur smánarlega lágar bætur til manna sem hafa verið rændir æskunni, sviptir réttindum til skólagöngu og látnir þræla fyrir ríkið við ómannúðlegar aðstæður. Að endingu verður að nefna einkennilegt innskot ráðherrans um það að ekki séð við að eiga sömu handahafa ríkisvaldsins nú og þegar ríkið braut á þessum mönnum. Hvað er hann að reyna að segja með þessu? Mín túlkun er þessi: sjáið hvað við erum góðir, við ætlum að borga þótt þetta komi okkur ekki neitt við í rauninni.

Handaband fyrir handbendi

Ég er enn að hugsa um tilurð hins nýja meirihluta í borginni. Ólafur F fyrrverandi borgarstjóri hefur marglýst því að hann hafi verð gabbaður til samstarfs með málefnasamningi sem var of góður til þess að geta staðist. Nú hefur komið í ljós að það reyndist rétt. Helstu hugðarefni Ólafs, friðun sögulegra húsa og götumyndar við Laugaveginn, náttúruvernd, stöðvun Bitruvirkjunar og vera flugvallarins í Vatnsmýri sett á blað og Sjálfstæðismennirnir skrifuðu uppá þetta allt saman. Og Ólafur undi glaður við sinn málefnasamning, enda innsiglaður með handabandi við Kjartan M og Villa gamla góða. Betra gerist það ekki í pólitíkinni. Ólafur sprengdi Tjarnarkvartettinn í trúnni á handabandið, Sjálfstæðisflokkurinn komst aftur inn og í fyllingu tímans fékk Ólafur ný skilaboð „vertu úti“. Handsöluðu málefnin hans Ólafs hurfu á fyrsta degi hins nýja samstarfs við Óskarinn. Handabandið var aldrei alvöru, þetta var s.k. gabbhreyfing. Mikið notuð í íþróttum og greinilega viðurkennd í stjórnmálum.

Í þessu ljósi er áhugavert að fylgjast með Hönnu Birnu, nýja borgarstjóranum. Hún hefur að sjálfsögðu verið í mörgum fjölmiðlaviðtölum eftir að það samstarfinu við Ólaf F. var rift og Óskarsverðlaunahátíðin hófst (Óskar uppskar margvísleg verðlaun fyrir sig, vini sína og flokkinn). Ég gríp hér niður í viðtal á Rás 2 21. ágúst s.l.Fréttamaður spyr: „Talandi um Bitruvirkjun, nú ætlið þið að hefja undirbúning á henni að nýju. En þeim var hætt efrtir úrskurð Skipulagsstofnunar sem taldi of mikil óafturkræf umhverfisáhrif af virkjuninni. Er ykkur stætt á að fara út í þessar framkvæmdir með þann úrskurð á bakinu?  

Hanna Birna: Við förum ekki út í framkvæmdir, við höldum áfram rannsóknum á svæðinu. Við höldum áfram þessum undirbúningi. Það er aðalatriðið…..

Fréttamaður: En til hvers að fara út í rannsóknir ef ekki á að framkvæma?

Hanna Birna: Nú af því að það er okkar skoðun í þessum meirihluta að það eigi að fara í þessar framkvæmdir.“

Svör Hönnu Birnu eru einnig gabbhreyfingar; „ekki framkvæmdir - förum í framkvæmdir“. „Aðalatriðið“ er í raun aukaatriðið.

Í næstu kosningum kemur í ljós hvort Sjálfstæðisflokkurinn kemst upp með þessi vinnubrögð. Framsókn hverfur sem betur fer af vettvangi og Frjálslyndir sömuleiðis. Það verða ekki mörg tækifæri til þess að dubba litla flokka upp í borgarstjórastól eða aðrar vegtyllur gegn því að starfa með Sjálfstæðismönnum.