Menningarnótt

Ég sá um lítið atriði á Menningarnótt:

„Gönguferð þar sem þátttakendur fá innsýn í sögu miðborgarinnar og líf og störf forfeðra sögumanns í borginni. Meðal þeirra sem kynntir verða til sögunnar eru Bernhöft bakari, Einar borgari, Ingibjörg kona Jóns Sigurðssonar, Þorlákur Ó Johnson kaupmaður og Jafet lóskeri hjá Innréttingunum sem bjó í Grjóta“.

Ég fór þrjár ferðir og hátt í 200 manns röltu með mér. Fyrsta ferðin kl. 10 tókst vel eftir smá tafir af völdum Maraþonhlaupsins. Af einhverjum ástæðum þá töldu skipuleggjendur hlaupsins nauðsynlegt að spila tónlist á fullum dampi milli þess sem hópar þátttakenda hlupu af stað.

Ferð númer tvö, kl. 12, varð sú besta þótt víða þurfti að sveigja af leið vegna tónlistarflutnings.

Þriðja ferðin, kl. 14, varð verst úti því þá var byrjað að þenja hljóðfæri á mörgum stöðum. Á Austurvelli var töluverður hávaði frá mótorhjólamönnum sem þar sýndu listir sínar. Í Aðalstræti var tónleikahávaðinn svo mikill  um kl. 15 að ég gat ekki fylgt áætluninni og flúði með minn hóp á kyrrlátari stað og varð ég því að sleppa hluta af mínu prógrammi.

Eftir þessa reynslu fór ég að velta fyrir mér hvort þessi yfirþyrmandi flutningur á popptónlist á Menningarnótt sé ekki kominn út fyrir æskileg mörk. 

Var Anders Breivik einn að verki?

Fjöldamorðinginn Andres Behring Brevik er skv. flestum skilgreiningum síkópati (haldinn andfélagslegri persónuröskun).

Samviskulaus og gjörsneyddur samkennd með öðrum manneskjum fer hann um og myrðir fólk sem hann hatar. Allt bendir til þess að hann hafi verið einn á ferð, bæði þegar hann undirbjó verknaðinn og í sjálfri morðárásinni.

En þessi norski síkópati er ekki einn í sínum brenglaða hugmyndaheimi. Yfirlýsingar hans um tilgang morðanna sýna hvaðan þessi sjúki maður fær hvatninguna. Hugur hans er einskonar ruslafata sem er full af áróðri haturspredikarnna á hægrivæng stjórnmálanna.

Í Evrópu eru flokkar og hreyfingar sem beina hatursáróðri gegn múslimum, samkynhneigðum, og fjölmenningarsamfélögum. Þeir ráðast gegn mannréttindum og lýðræði og boða kynþáttahyggju (rasisma). Í orðaflaumi þeirra er „vinstri-marxistum“ formælt, ráðist gegn kvenfrelsi og frjálslyndi hverskonar. Á Íslandi birtist þessi áróður aðallega á netsíðum og bloggi.

Lýðræðið, mannréttindin og fjölmenningarþjóðfélagið eru skotmörk þjóðernissinnaðra hægrimanna, skotfærin er lýðskrum og þjóðremba. Það sem Andres Brevik skrifaði skar sig ekki frá mörgu því sem aðrir hafa birt af hugmyndum sínum um þjóðfélgsmál.

Annar þáttur þessa máls er sú dýrkun á hermennsku og háþróaðri drápstækni sem birtist í tölvuleikjum sem milljónir ungra manna stunda um allan heim. Myndin sem Anders Brevik hefur birt af sér líkist auglýsingu fyrir tölvuleik, maður með vélrænt útlit búinn háþróuðu drápstæki. Hægri öfgarnar og vopnadýrkunin eiga eftir að leiða fleiri siðblinda einstaklinga til voðaverka líkt og Anders Brevik framkvæmdi.

Eina leiðin

Þegar málefni Ísraels og Palestínu ber á góma hérlendis þá verða ætíð mjög fyrirsjáanleg viðbrögð hjá hópi manna sem styður þjófnað Ísraels á landi frumbyggja Palestínu.

Nú síðast kviknaði umræða vegna ferðar Össurar utanríkisráðherra á fund Palestínumanna.

Viðbrögð stuðningshópsins byggjast aðallega á því að gera alla sem ekki fallast á framferði Ísraels gagnvart Palestínumönnum tortryggilega. Þeir eru sagðir óupplýstir um raunverulegan gang mála, stuðningsmenn hryðjuverkamanna og gjarnan er því bætt við að gagnrýnendur Ísraels séu gyðingahatarar.


Ólafur Jóhannsson, formaður samtakanna Zion, vinir Ísraels segir að Össur „þekki ekki aðstæður þeirra sem hafa búið þarna. Ég hef búið þarna lengi og þekki vel til“.Ólöf Einarsdóttir, íslensk móðir í Ísrael sem gift er ísraelskum gyðingi skrifar í Morgunblaðið „það sem hann (Össur) hefur látið eftir sér hafa í blaðaviðtölum er lýsandi dæmi um skilningsleysi hans á stöðu mála hérna“.

Nú er það svo að staða mála á þessu svæði er öllum augljós, bæði þeim sem styðja málefni Ísraels og hinna sem gagnrýna þá og styðja málstaða Palestínumanna.

Báðir aðilar vita að það er tekist á um landsvæði og að Ísrael tekur æ stærri hluta Palestínu af frumbyggjunum með hernaði og brottrekstri. Báðir vita að gyðingar telja sig eiga landið og báðir aðilar vita að Palestínumenn hafa barist gegn framrás Ísraela.Það þarf enginn að vera búsettur í Ísrael til að vita þetta og skilja aðstæðurnar.

Svo er hin það hliðin á þessu máli: Hvor aðilinn á meiri rétt til landsins?  Ríkið Ísrael er afsprengi síonismans og Ísraelar eru flestir fæddir utan landsins eða afkomendur innflytjenda. Palestínumenn eru hinsvegar afkomendur fólksins sem hefur búið í landinu í þúsundir ára.  Vandamálið verður flóknara vegna þess að menn blanda trúarbrögðum í málið.

Hin einfalda lausn er hinsvegar sú að menn fylgi samþykktum Sameinuðu þjóðanna, ákvæðum um mannréttindi og alþjóðalögum um samskipti þjóða.

Þetta er eina leiðin til þess að allir sem búa á hinu umdeilda landi, bæði Ísraelar og Palestínumenn, geti búið þar til framtíðar í friði og farsæld.

Vaselín og niðurgyrtar buxur

Þórir Kristinsson er höfundur þessara ummæla. 

Þórir 5.7 2011 15:56      Gyðingahatarinn og lygalaupurinn Össur virðist vera algjörlega tvíhöfða þegar hann talar um fasistaríkið ESB. Hér heima þykist hann og Samfylkingin vera einhverskonar ígildi Jóns Sigurðssonar þjóðfrelsishetju en í Brusselparadísinni er það bara vaselín og niðurgirtar buxur.

Þórir 2011-07-06 08:19:28      Ógnarstjórn Jóhönnu heldur áfram að fremja glæpi gegn íslensku þjóðinni. Tugþúsundir flúnar land. mest atvinnuleysi sem nokkurn tímann hefur mælst 25000 heimili á leiðinni í gjaldþrot. 30000 glötuð störf. lífvænleg fyrirtæki skattlögð í þrot. þúsundir treysta á matargjafir frá hjálparstofnunum. ríkisstjórnin notar hvert ´tækifæri til að tala um gífurlegan árangur!!!!!! Samfylkingin lýgur stanslaust um Brusselparadísina í skrifræðishimnaríki en steingleyma að tala um Grikkland Írland portúgal og Spán og gífurlegar efnahagsþrengingar fjölmargra evrópuríkja fyrir utan að meirihluti breta og frakka vill segja skilið við þennan skítaklúbb sem aðeins þjónar hagsmunum stjórnmálamanna en ekki fólksins. En hver vill ekki tilheyra esb aðlinum sem fær alla sína vinnu Skattfrjálst. En samfylkingarsnillingarnir tala ekki þetta ekki frekar en framúrkeyrslu ríkissins fyrstu fjóra mánuði ársins sem nemur meiri halla en á heilu ári en Esb innlimunin kostar sitt og betra finnst þeim að loka sjúkrahúsum og svelta menntastofnanir.

Þórir 2011-07-02 11:14:12       hvernig væri að Samfylkingar grautarhausarnir hættu að hugsa með rassgatinu. Útgerð verður að vera hagkvæm og skila arði. Allar breytingar á góðu kerfi verður að gera með vitrænum hætti.

Þórir 2011-06-24 07:47:30       Hinn yfirburðagreindi Hannes Hólmsteinn er jafnan skotspæni treggáfaðra. Uppáhaldsskotmark persona non grata. Útúrsnúningar á borð við"græðir á daginn og grillar á kvöldin" er ákveðið vörumerki fyrir kjána sem aldrei sáu sólina fyrir Ingibjörgu Sólrúnu með sitt fíkniefnalausa Ísland árið 2000.Hvað skrif Hannesar varðar eru þau auðvitað hárrétt. Eftirá-besserwisserar vinstri elítunnar pissa eins og vanalega í skóna sína og hrópa síðan dýrð sé Brusselguði í hæstum skrifræðishæðum og píslarvættum vorum Steingrími J. og flughræddu flugfreyjunni heilagri Jóhönnu.

Vofa kommúnismans

Bandamenn Geirs H. Haarde hafa myndað félagsskapinn Málsvörn.

Á heimasíðu Málsvarnar má lesa eftirfarandi: „Málsvörn er áhugahópur um réttláta málsmeðferð í máli Geirs H. Haarde, fyrrverandi forsætisráðherra, fyrir landsdómi.“

Í þessum orðum er íað að því að það sé hætta á ferðum - að Landsdómur gæti tekið uppá því að sniðganga réttlætið, hunsa lögin og fella dóm yfir Geir - þótt það kæmi uppúr kafinu að kallinn sé saklaus af öllu því sem á hann er borið.

Er ástandið slíkt á íslandi að það þurfi baráttu vina og velunnara Geirs til þess að tryggja að hann fái réttláta málsmeðferði?

Geir sjálfur hefur kosið að setja málið í þennan farveg - að það séu pólitískir andstæðingar hans sem standi á bakvið „fyrstu pólitísku réttarhöldin á Íslandi“.  Og svo nafngreindi hann þrjár flokksmenn VG.

Skeiðar þá inn á ritvöllinn Hannes Hólmsteinn Gissurarson. Sá er ekki í vafa hvar við erum stödd:„Atli, Steingrímur og Ögmundur eru pólitískir erfingjar kommúnistahreyfingarinnar íslensku, en þar sem kommúnistar komust til valda, settu þeir jafnan á svið sýndarréttarhöld yfir andstæðingum sínum“

Og Hannes veit hvert stefnir ef menn styðja ekki Geir: „Sakborningarnir voru skotnir í hnakkann í kjallara Ljúbjanka-fangelsisins.“

En eitthvað hefur þokast áfram í henni versu, því Hannes skrifar: „Sennilega eigum við samt í ljósi sögunnar að þakka fyrir, að þeir Atli, Steingrímur og Ögmundar krefjast ekki harðari refsingar. En eru framfarirnar þær, að mannæturnar eru farnar að nota hníf og gaffal?“

Karl Marx skrifaði „Vofa kommúnismans gengur ljósum logum“. En Draugabaninn Hannes Hólmsteinn er hvergi banginn, hann sameinar í einni persónu riddarann sjónumhrygga og Munchausen Barón.

Friðarsamtök í „Blitzkrieg“

Styrmir Gunnarsson, fyrrverandi ritstjóri, kvartar yfir því að ESB aðildarsinnar séu óduglegir að halda fram ágæti málstaðarins.

Styrmir skrifar á bloggsíðu sinni: „Af þeirra hálfu fara ekki fram nokkur skoðanaskipti, sem orð er á gerandi við andstæðinga aðildar“. Og Styrmir spyr: „Hvað ætli valdi þessari tregðu aðildarsinna til þess að taka þátt í almennum og opnum umræðum um Ísland og Evrópu?“

Og Styrmir svarar spurningunni sjálfur: „Þeir treysta á það að „skriðdrekar“ ESB í Brussel ryðjist yfir allt án nokkurrar mótspyrnu og leggi Ísland undir sig á skömmum tíma. Þeir sjá fyrir sér eins konar „Blitzkrieg“ af hálfu ESB á Íslandi“.

En Styrmir veit að vonir aðildarsinna um „Blitzkrieg“ og yfirtöku Íslands eru innihaldsrýrar. Hann veit að ESB mun aldrei „ryðjast yfir allt“.

6. júní 2010 lýsti Styrmir því yfir í blaðinu Grapewine að „ESB eru friðarsamtök“ („It is a peace-keeping organisation“) og “dásamleg og göfug hugsjón“ („The EU is a wonderful and noble idea“).

Aðildarsinnarnir eru sem sagt haldnir þeirri vonarblekkingu að ESB séu ágeng og ætli sér yfirtöku á Íslandi en Heimssýnarmaðurinn Styrmir segir ESB vera friðarsamtök og fína hugmynd!

Ég verð að viðurkenna að ESB sinnum er vorkunn - ég skil tregðu þeirra til að eiga skoðanaskipti við menn sem segja eitt í dag og annað á morgun.

Friðarverðlaunahafi í drápshug

Bandaríska ríkisstjórnin, undir stjórn friðaverðlaunahafans Obama, hefur hefnt fyrir árásina á tvíburaturnana, morðið á Osama Bin Laden er hrein hefndaraðgerð. Aftaka án dóms og laga.

Vopnlaus maður er myrtur í augsýn fjölskyldu sinnar, líkinu stolið og því hent fyrir hákarla. Og lýðurinn fagnar á götum úti.

Í Guantanamo fangelsinu sátu hundruð manna sem ekkert höfðu til saka unnið. Gamalmenni og unglingar.

Bandaríkin brutu gegn fullveldi Pakistans með árásinni gegn Osama Bin Laden. Þremur dögum eftir aftöku Osama notuðu bandarískir hermenn mannlausar njósna- og árásaflugvélar til að drepa 15 Pakistana og í síðasta mánuði voru 44 Pakistanar drepnir með samskonar vopnum. Mannréttindanefnd Pakistan telur að á árinu 2010 hafi slíkar vélar verið notaðar til að drepa 957 saklausa borgara.

Ríkisstjórn sem hagar sér með þessum hætti er komin á sama stig villimennsku og þeir sem hún segist vera að berjast gegn.

Það er vegið að lýðræðinu og réttaröryggi almennings, ógnin kemur bæði frá siðlausum hryðjuverkamönnum og siðlausum ríkisstjórnum

Þeir sem láta ekki kúga sig

45% þjóðarinnar sögðu nei við Icesave III, 30% sögðu já og 25% sátu heima.

Styrmir Gunnarsson, fyrrverandi ritstjóri, er búinn að skilgreina hópinn sem kaus neiið: „Afkomendur þeirra, sem fyrir ellefu hundruð árum vildu ekki láta kúga sig í Noregi hafa sýnt hverrar gerðar þeir eru.“

Nú sýna rannsóknir á uppruna Íslendinga að þeir eru „blandaðir“ svo ekki sé meira sagt. Upphaflega blöndunin fólst í því að um 20% karlmanna og um 60% kvenna voru með keltneskt blóð og hinir norskt. Síðan hafa bæst við í kokteilinn afkomendur Dana og á síðari tímum fólk frá öllum heimshlutum.

Það eru þá þessi 45% sem samkvæmt hugmyndum Styrmis sýndu „hverrar gerðar þeir eru“. 55% landsmanna eru skv. Styrmiskenningunni afkomendur keltanna sem hingað voru fluttir nauðugir og Dana sem hingað komu.

Ég held að þarna sé komin skýring sem gæti haft afgerandi áhrif í væntanlegri þjóðaratkvæðagreiðslu um ESB aðild. Afkomendur Íra og Dana vilja sameinast frændum sínum sem eru í ESB - en íslensku Norðmennirnir vilja ekki í ESB! Þeir láta ekki kúga sig!

Er þetta ekki kýrskýrt?

Eða er þetta bara bull hjá Styrmi og mér?

Sigmundur með sextán skó

Sigmundur Davíð útskýrði Icesavemálið fyrir þjóðinni í Kastljósi kvöldsins.

Hann ræddi mögulega niðurstöðu EFTA  dómstólsins varðandi sakfellingu fyrir brot á EES samningnum vegna þess að innstæðueigendum Landsbankans í Englandi og á Íslandi var mismunað.

Sigmundur greip til líkingamáls, þreif í jakka  Sigmars þáttastjórnanda og sagði að fyrir hrun þá hefðu bæði enskir og  íslenskir sparifjáreigendur getað keypt sér 10 svona jakka.

En eftir hrun þá hefði sá enski, sem fékk allt  greitt út í pundum getað keypt sér aðra 10 jakka, en íslenski  sparifjáreigandinn sem fékk allt sitt einnig greitt út, en því miður í íslenskum krónum, gat  einungis keypt sér 6 jakka. Og Sigmundur spurði: „Hvor fær sitt bætt?  Englendingurinn fær allt sitt, Hollendingurinn fær allt sitt. Íslendingurinn  hinsvegar fær minna“

Það er augljóst, sagði Sigmundur Davíð, að það  er sá íslenski sem hefur orðið fyrir mismunun. 6 jakkar eru ekki það sama og  10.

Þegar hér var komið sögu þá fór ég að klóra  mér í hausnum og fann að samúð mín var hjá íslenska aðilanum sem gat ekki keypt  sér nema 6 jakka. Dæmið varð þó aldrei raunverulegt í mínum huga þar sem þetta  magn af jökkum vafðist fyrir mér. Sigmundur Davíð er að vísu af efnafólki og giftur inn í milljarðafjölskyldu og áttar sig betur á svona kaupstandi heldur en  ég.

Hvað um það - niðurstaða formanns  Framsóknarflokksins var sú að það væri ekki hægt að dæma þjóð, sem fær borgað í  ónýtum gjaldeyri, fyrir brot á milliríkjasamningum.

Ég hinsvegar dró þá ályktun að þetta væri  gengis-mismunur en ekki mismunun eins og Sigmundur taldi.

Ég vissi að króna er ekki það sama og pund og  ég vissi að krónan skítféll - en ég vissi ekki að þessi skilningur á mismunun  væri í EES samningum? Ég hélt að aðgerðir íslenska ríkisins, þegar það tryggði íslenska sparifjáreigendur en lét þá bresku og hollensku róa, væri hin saknæma mismunun. Ef skilningur Sigmundar er réttur þá erum við í góðum málum

En svo rifjaðist það upp fyrir mér að þetta er ekki í fyrsta sinn sem jakkainnkaup hafa ruglað Framsóknarmenn í ríminu.  Í janúar 2008 varð mikill hvellur þegar Björn Ingi keypti 5 jakkaföt á kostnað  flokksins. Þá fannst mörgum framsóknarmönnun  innkaupin vera misferli. 

 

 

 

Nú er nei-ið alvöru nei!

Hluti af málatilbúnaði nei-sinna hefur verið sá að eftir nei-ið í fyrri þjóðaratkvæðagreiðslunni hafi í raun ekkert gerst af því sem ýmsir óttuðust.

Bretar og Hollendingar lögðu ekki fram stefnur, lánakjörin heldust þau sömu og dómsdagspárnar opinberuðu sig ekki osvfrv.

Það sem menn verða að hafa í huga varðandi þetta var að höfnun Icesave II var höfnun á samningi sem var þegar úreltur á kjördag og málið var enn í samningsferli. Einnig lá fyrir að íslensk stjórnvöld stóðu enn við sín loforð um að semja.

Mögulegt nei á morgun er allt annað nei og meira. Þá er ekkert samningaferli í framhaldinu.

Nú er það þjóð (eða lýðræðislegur meirihluti hennar) sem segir „við semjum ekki og við borgum ekki!“.

Þá er ekkert lengur sem heitir að hugsa sig um -  sá tími er þá liðinn.

Nú verða menn að glíma við nýtt ástand og taka því sem að höndum ber.

Vonandi rætast ekki vondu spárnar - vonandi mun glannaskapurinn ekki bitna á hinum barnkæru nei-sinnum. Vonandi.

Segjum já!